19.08.2008 Xuan Cubiella Solís
La Feria de Muestres d’Asturies ye un llugar nel que la llingua asturiana nun tien presencia, a pesar de querer representar a tolos asturianos, de los que tovía munchos falamos esa llingua. Sicasí, hai dellos casos especialmente graves polos que dellos asturianos tamos protestando énte’l Gobiernu del señor Areces y énte l’Ayuntamientu de Xixón, pola falta de presencia del asturianu nos pabellones d’estes dos instituciones.
Pero’l casu del pabellón del Conceyu de Xixón ye especialmente negativu, pues a pesar de que la propia alcadelsa, Paz Fernández Felgueroso, dio un plazu a la so alministración pal correctu usu de los toponimos oficiales de la ciudá, recuperaos n’asturianu el 4 d’ochobre de 2006 (incumpliéndose’l so usu obligatoriu de contino), nel estand xixonés de la FIDMA pudieron vese los topónimos como Cimavilla o Xove cola versión tracamundiada y d’usu illegal per parte de les alministraciones.
¿Ónde taba’l conceyal, miembru del gobiernu de Felgueroso, Jesus Montes Estrada “Churruca” pa defender una cuestión que pertenez al so ámbitu de xestión? ¿Ónde quedó la orde de l’alcaldesa emitida va cerca d’un añu?
D’otru llau prestaríame dar la norabona a EMTUSA, onde l’usu de la toponimia y del asturianu na carteleria de los autobuses ye mui correctu y d’acordies cola Llei. Convidaría a EL COMERCIO a usar tamién esa toponimia, qu’anque nel ámbitu priváu nun ye obligatoria, podría facer un gran bien pal caltenimientu del patrimomiu cultural d’esta ciudá.
Xuan Cubiella 