Foru Asturies punxo nes sos llistes electorales a Carlos Rubiera pa facese col votu asturianista nes últimes elecciones y l’alcaldese nomólu dempués conceyal de Cultura, Educación y Fiestes. Viendo los resultaos no que cinca al usu del asturianu, o Rubiera pasa de too o nun-y dexen facer. En tou casu, ye un engañu al electoráu que votó a Foru pola presencia de Rubiera na llista, como pudo vese cola brutal baxada de votos nes fuercies polítiques asturianistes nel conceyu.
Pero ye que mientres nun desendolca nenguna política asturianista dende la so responsabilidá, y hasta vemos retroceder nel usu del asturianu, amás ye que les sos promeses principales y personales, como conceyal de Cultura, tán siendo inoraes dafechu pol gobiernu de Carmen Moriyón. La última ye l’anunciu de la vuelta a los grandes conciertos, sobre los que Carlos Rubiera dixo n’EL COMERCIO del 1 d’ochobre del añu pasáu, va pocos meses, que “La política de macroconciertos ta escluyida porque ta pasada d’época”.
Nun fai lo que s’espera d’él col asturianu, nun-y faen casu nel so programa pa cultura. ¿Qué mueve a Rubiera pa siguir nel so puestu si nun fai nada de lo prometío? Si en Xixón se cambió de partíu de gobiernu, creo que sedría pa cambiar de polítiques, non pa siguir con más de lo mesmo. Agora supongo que veremos a Rubiera cantando na primer fila de Bruce Springsteen. Por dignidá, cambie o déxelo.
Xuan Cubiella Solís
Xuan Cubiella 